Tollgæslan greinir mikla aukningu á innflutningi á sterum

Kári Gunnlaugsson, yfirtollvörður tollgæslunnar á Keflavíkurflugvelli, segir að embætti hafið orðið vart við töluverða aukningu á innflutningi á sterum hingað til lands síðustu misseri, bæði í vökvaformi sem og í pilluformi.

Í síðustu viku lagði tollgæslan hald á um lítra af sterum sem voru sendir hingað með pósti en í innihaldslýsingunni var því haldið fram að um hnetuolíu væri að ræða.

Hægt var að búa til 2000 ambúlur (en ambúla er ein neyslueining) úr vökvanum og því ljóst að um töluverð verðmæti er að ræða.

„Við merkjum aukningu í þessu, þetta hefur verið mun meira en síðustu ár," segir Kári en í nóvember síðastliðnum var íslenskur karlmaður stöðvaður á Keflavíkurflugvelli með 35 þúsund steratöflur og 500 ambúlur. Sá var að koma frá Þýskalandi.

Kári segist ekki hafa tekið saman hversu mikla aukningu sé um að ræða, en það sé ljóst að hún er allnokkur sé tekið mið af meðaltali slíkra smygla á síðustu árum.

„Þetta virðist koma í bylgjum," segir Kári. „Þetta er óvanalega mikið," bætir hann við en segist ekki geta gefið upp nánari upplýsingar um önnur mál varðandi innflutning á sterum, þar sem þau eru öll enn til rannsóknar hjá lögregluyfirvöldum.

Kári segir að það þurfi hinsvegar að laga eitt í lagaumhverfinu, sem er að innflutningur á sterum varðar ekki við fíkniefnalöggjöfina, heldur lyfjalöggjöfina. Því séu refsingar mun vægari. „Þessu er öfugt farið annarstaðar á Norðurlöndum," segir Kári.