Jón Steinar stefnir Þorvaldi Gylfasyni

Jón Steinar Gunnlaugsson hæstaréttardómari hefur ákveðið að stefna Þorvaldi Gylfasyni prófessor fyrir dómstóla vegna greinar sem Þorvaldur skrifaði í ritröð háskólans í Munchen í Þýskalandi og birt var í mars slíðastliðnum. Jón Steinar greinir frá þessu í aðsendri grein sem birtist í Morgunblaðinu í dag. Í greininni segir Jón Steinar að Þorvaldur hafi verið með aðdróttun í sinn garð, um að hann hafi misfarið með vald sitt sem dómari við Hæstarétt með því að semja fyrst með leynd kæruskjal til réttarins og stjórna síðan afgreiðslu þess. Þar á Þorvaldur við kæru vegna framkvæmdar kosninga til stjórnlagaþings árið 2010.

„Framferðið sem dylgjað er um að ég hafi viðhaft er áreiðanlega refsivert og hlyti ef satt reyndist að varða embættismissi. Hér má raunar einnig greina dylgjur sem beinast að hinum dómurunum því þeir eru sagðir hafa notað „átyllu" (pretext) til að komast að niðurstöðu,“ segir Jón Steinar í greininni.

Jón Steinar segir jafnframt að sterk rök standi til þess að láta ekki skrifum Þorvalds ósvarað. „Sé það gert er hætt við að skrifarar muni fyllast sjálfumgleði og telja að þeir muni framvegis komast óáreittir upp með ærumeiðingar sínar og þá meðal annars brigsl um að dómarar misbeiti valdi sínu vísvitandi til að skaða menn,“ segir Jón Steinar í greininni.