ÁTVR bannað að selja sígarettur sem eru ekki sjálfslökkvandi

Innanríkisráðuneytið hefur staðfest þau fyrirmæli Neytendastofu að ÁTVR beri að taka af markaði sígarettur sem ekki uppfylla öryggiskröfur þar sem þær eru ekki sjálfslökkvandi.

Í ákvörðun Neytendastofu frá 16. nóvember 2011 synjaði Neytendastofa beiðni ÁTVR um að fá leyfi til að selja af vörulager sígarettur sem ekki teljast lengur öruggar samkvæmt framangreindum staðli og reglum á Evrópska efnahagssvæðinu.

Áfrýjunarnefnd neytendamála vísaði máli ÁTVR frá í febrúar 2012. Í úrskurði innanríkisráðuneytisins segir:

„Í ljósi þeirrar ströngu ábyrgðar sem gerð er til framleiðanda og dreifingaraðila í lögum nr. 134/1995 og lögum nr. 25/1991, um skaðsemisábyrgð og þess að flest öll fyrirtæki draga óöruggar vörur tilbaka af markaði, telur innanríkisráðuneytið það farsælast að ÁTVR hætti dreifingu og sölu á sígarettum sem ekki uppfylla staðalinn".

Neytendastofa vill því að gefnu tilefni ítreka að óheimilt er að flytja inn og dreifa hér á landi sígarettum sem ekki uppfylla þennan samevrópska öryggisstaðal varðandi kviknunareiginleika á sígarettum.

Ekki kemur fram af hvaða tegund tóbakið er.