Stefna á engin banaslys eftir 2020

Sænski bílaframleiðandinn Volvo hefur það á stefnuskrá sinni að frá árinu 2020 muni enginn láta lífið í nýjum Volvobílum né slasast alvarlega.

Þetta kom fram í máli Anders Eugenson frá Volvo en hann er á meðal þáttakenda á veggerðarráðstefnunni Via Nordica 2012 sem fram fer í Hörpu þessa dagana en það er Norræna vegasambandið sem stendur fyrir ráðstefnunni. Eugensson kynnti þessa framtíðarsýn Volvo í Eldborgarsalnum í morgun og hann segist bjartsýnn á að markmiðinu verði náð.

„Við treystum mikið á virka öryggistækni, tækni sem hindrar eða dregur úr óhöppum. Með þessu er hægt að bæta öryggið mikið, með þessu er hægt að koma í veg fyrir árekstra eða gera þá miklu vægari," segir Eugenson hjá Volvo.

Volvo setti sér markmiðið árið 2007 og segir Eugenson að fyrirtækið sé sífellt að meta árangurinn og aðlaga stefnuna. Tækninni fleygir fram og nú þegar sé kominn búnaður í Volvo bíla sem dragi úr hættunni á mistökum ökumanns eða grípi inn í þegar í vandræði stefnir. Eugenson líkir Volvo framtíðarinnar við hest bóndans.

„Bóndinn getur stjórnað hestinum og ákveðið hvert hesturinn á að fara. En ef bóndinn sofnar eða stefnir á hindrun getur hesturinn farið heim eða komið í veg fyrir að hann lendi á hindruninni. Bíllinn getur verið eins."