Íslenska ríkið þarf að bregðast við kærum Erlu

Lögmenn Erlu Hlynsdóttur fréttamanns hafa fengið bréf frá Mannréttindadómstól Evrópu vegna tveggja mála gegn íslenska ríkinu sem Erla hefur kært til dómstólsins. Annað málið snýst um dóm sem Erla hlaut eftir að Rúnar Þór Róbertsson, dæmdur fíkniefnasmyglari, var til umfjöllunar í grein Erlu í DV. Hitt málið tengist Helgu Haraldsdóttur, eiginkonu Guðmundar Jónssonar í Byrginu, en hún höfðaði mál gegn Erlu sem endaði með dómi yfir henni í Hæstarétti. Í báðum tilfellum telur Erla að stjórnarskrárvarinn réttur sinn til tjáningarfrelsis hafi verið brotinn og vísaði hún málunum því til Mannréttindadómstólsins. Erla hefur þá fengið þrjú mál til skoðunar hjá Mannréttindadómstólnum því að íslenska ríkið var dæmt skaðabótaskylt gagnvart henni um mitt síðasta sumar.

„Við höfum fengið bréf frá Mannréttindadómstólum í báðum þessum málum þar sem tilkynnt er að ákveðið hafi verið að gefa íslenska ríkinu kost á að skila inn skriflegum athugasemdum sínum í málinum fyrir 15. janúar 2013 og svara spurningum dómstólsins um málið," segir Gunnar Ingi Jóhannsson, lögmaður Erlu, og bætir því við að jafnframt sé óskað eftir afstöðu ríkisins til þess að semja í málinu.

Gunnar Ingi segir að framhaldið verði síðan það að hann fái greinargerð íslenska ríkisins til umsagnar og Erla og lögmenn hennar fái að leggja fram bótakröfu í báðum málunum. „Síðan mun dómstóllin taka ákvörðun um það hvort tilefni sé til þess að leggja dóm á málið," segir Gunnar Ingi.

Gunnar segist telja að það sé líklegasta niðurstaðan að dómstóllinn tilkynni að málið verði tekið til efnislegrar meðferðar og dæmi í málinu. Það stefni því í áfellisdóm yfir íslenska ríki nú eins og í sumar. Þann 10. júlí síðastliðinn var íslenska ríkið dæmt skaðabótaskylt gegn Erlu og Björk Eiðsdóttur vegna brota á tjáningarfrelsi.