Blaðamenn geti fjallað um málefni á borð við mansal og nektardansstaði

Það er tími til kominn að menn átti sig á því hvað tjáningarfrelsið skiptir miklu máli hér á Íslandi og að því sé gefið svigrúm til að vinna fyrir samfélagið, segir Hjálmar Jónsson, formaður Blaðamannafélags Íslands. Mannréttindadómstóll Evrópu komst í morgun að þeirri niðurstöðu að íslenska ríkið hefði brotið gegn tjáningarfrelsisákvæði Mannréttindasáttmálans þegar Erla Hlynsdóttir og Björk Eiðsdóttir blaðamenn voru dæmdar í héraði og Hæstarétti til að bera ábyrgð á ummælum viðmælenda sinna. Blaðamannafélagið tók þátt í málarekstrinum með Lögmönnum Höfðabakka, Björk og Erlu. „Ég held að þetta sé stór dagur í sögu tjáningarfrelsisins á Íslandi," segir Hjálmar Jónsson.

Þrátt fyrir að þeim lagaákvæðum, sem voru grundvöllur fyrir dómunum hér heima í málum gegn Björk og Erlu, hafi verið breytt telur Hjálmar að löggjafarvaldið og dómsvaldið þurfi að hugsa sinn gang þegar kemur að vernd tjáningarfrelsisins. „Ég held nú að það sé ekki bara lagaákvæðin heldur líka skilningur dómstóla á hlutverki tjáningarfrelsisins sem hafi háð íslenskum dómstólum. Það sér maður í allt of mörgum tilfellum," segir hann.

Hjálmar segir að miklu máli hafi skipt að fá þann skilning staðfestan, sem sé almennur í Evrópu, að tjáningarfrelsið skipti svo miklu máli að það þurfi að vera mjög knýjandi ástæður sem geri það að verkum að lagðar séu hömlur á það. „Í þessum tilfellum var verið að fjalla um möguleika á mansali og starfsemi nektardansstaða. Ef það hefur ekki almenna skírskotun og á ekki að vera umfjöllunarefni fjölmiðla þá veit maður ekki hvað fjölmiðlar eiga að fjalla um," segir Hjálmar.