Þrjúhundruð unglingar í Háskólann

Ríflega þrjú hundruð krakkar á aldrinum 12-16 ára settust í morgun á skólabekk í Háskóla unga fólksins sem starfræktur verður í Háskóla Íslands í þessari viku. Þar munu nemendur sækja fjölbreytt námskeið sem spanna hinar ólíku greinar sem kenndar eru við Háskóla Íslands.

Háskóli unga fólksins er nú starfræktur í níunda sinn og hefur frá upphafi verið árviss sumarboði við Háskóla Íslands. Nemendahópurinn í ár er afar fjölbreyttur og kemur alls staðar af landinu. Þá eru í hópi nemenda verðlaunahafar í Nýsköpunarkeppni grunnskólanna 2011 en meðal verðlauna í keppninni var boðskort í Háskóla unga fólksins.

Nemendur hafa sjálfir búið til sínar stundatöflur. Alls stóð þeim til boða á fimmta tug námskeiða, þar á meðal námskeið í stjörnufræði, heimspeki, fornleifafræði, lögfræði, frumkvöðlafræði, kínversku og kynjafræði auk lyfjafræði. Kennsla í Háskóla unga fólksins er í höndum fræðimanna og framhaldsnema við Háskóla Íslands.

Auk námskeiða í einstökum greinum hafa nemendur valið sér eina námsgrein á svokölluðum þemadegi miðvikudaginn 13. júní. Þá verja nemendur heilum degi í verkefni í greinum eins og fjölmiðlafræði, jarðvísindum, kvikmyndum, tölvunarfræði, viðskiptafræði og jafnrétti, lýðræði og stjórnmálum ásamt því að heimsækja stofnanir sem tengjast greinunum. Þannig munu nemendur í þemanu jafnrétti, lýðræði og stjórnmál heimsækja Jón Gnarr borgarstjóra í Ráðhús Reykjavíkur og fræðast um störf hans auk þess sem þingkonur taka á móti hópnum í Alþingishúsinu.

Botninn verður sleginn í Háskóla unga fólksins á veglegri lokahátíð föstudaginn 15. júní. Efnt verður til veislu á Háskólatorgi og nemendur, starfsfólk og kennarar fagna saman góðri viku.