Norski hreimurinn háir Hannesi: „Þetta fer af mér, ég lofa því“

„Það er alveg rétt, það er fullt af fólk sem hefur verið að benda mér á að það sé ótækt að hafa forseta sem talar ekki hreint," sagði Hannes Bjarnason, forsetaframbjóðandi í viðtali í Reykjavík síðdegis í dag þar sem hlustendum gafst tækifæri til þess að spyrja hann spjörunum úr. Hannes hefur verið búsettur í Noregi síðastliðin þrettán ár eins og vitað er, og líkt og flestir heyra hefur norskan tekið yfir íslenska hreiminn.

Hannes játar að þetta háir sér og fólk hafi látið þetta fara í taugarnar á sér, auk þess sem hann hafi verið gagnrýndur fyrir að vera ekki nægilega mælskur.

„Ég játa það að þetta háir mér," sagði Hannes en lofaði bót og betrun: „Þetta fer af mér, ég lofa því, en það tekur smá tíma."

Meðal þess sem kom fram í svörum Hannesar við spurningum hlustenda Reykjavík síðdegis var að hann væri kristinn, hann héldi í sína barnatrú og hún hefði hjálpað honum á erfiðum tímum.

Þá sagði hann að Íslendingar gætu lært margt af Noregi, meðal annars það að setja siðareglur, til dæmis fyrir forsetaembættið. Hægt er að hlusta á viðtalið við Hannes hér.