Tilboð í Vaðlaheiðargöng að renna út - í annað sinn

Framlengt tilboð í gerð Vaðlaheiðarganga rennur út eftir fjóra daga, þann 15. júní. Vegagerðin hefur farið þess á leit við lægstbjóðendur, ÍAV og Marti, að þeir framlengi tilboðið.

Átta mánuðir eru nú liðnir frá því tilboðin voru opnuð en ÍAV og Marti buðust til að vinna verkið fyrir 8.853 milljónir króna. Það var eina tilboðið undir kostnaðaráætlun og 636 milljónum króna lægra en næstlægsta boð.

Þegar tilboðin voru opnuð þann 11. október í haust vonaðist fulltrúi IAV og Marti til að geta hafið framkvæmdir fljótlega eftir áramót. Sú von rættist ekki, efasemdir voru á Alþingi um að veggjöld stæðu undir verkefninu, og þann 15. febrúar féllust verktakarnir á ósk um að framlengja tilboðið um fjóra mánuði.

Frá ÍAV fengust þau svör í dag að ósk Vegagerðarinnar um frekari framlengingu tilboðs yrði svarað fyrir 15. júní.

Með samþykkt fjáraukalaga þann 17. nóvember síðastliðinn hafði Alþingi veitt Steingrími J. Sigfússyni, þáverandi fjármálaráðherra, heimild til að ganga frá samningum um Vaðlaheiðargöng og kom þar fram í atkvæðagreiðslu þingmeirihluti fyrir málinu.

Þung andstaða birtist hins vegar áfram gegn Vaðlaheiðargöngum á Alþingi, ekki síst frá forystumönnum Vinstri grænna, Ögmundi Jónassyni, ráðherra vegamála, og Guðfríði Lilju Grétarsdóttur, formanni umhverfis- og samgöngunefndar. Fór svo að fjármálaráðherra treysti sér ekki til að ganga frá lánsfjármögnun, án enn skýrari heimildar þingsins. Kom það í hlut nýs fjármálaráðherra, Oddnýjar Harðardóttur, að leggja fram sjálfstætt stjórnarfrumvarp um heimild til ráðherra að undirrita lánasamning um Vaðlaheiðargöng.

Það mál bíður nú afgreiðslu Alþingis og var til annarar umræðu fyrir þremur vikum. Þeirri umræðu er ekki lokið en málið á síðan eftir að ganga til nefndar og til þriðju umræðu. Óvíst er um málslok og þannig eru Vaðlaheiðargöng ekki meðal 19 þingmála á dagskrá þingfundar í dag.