Vísindamenn brjótast inn í heila Hawkings

Eðlisfræðingurinn Stephen Hawking leitar nú nýrra leiða til tjá hugsanir sínar. Heilsu hans heldur áfram að hraka og senn líður að þeim degi að hann muni ekki lengur geta tjáð sig.

Hawking hefur því leitað á náðir forritara og vísindamanna og hefur hafið prufukeyrslu á byltingarkenndri tækni sem les heilabylgjur hans.

Tæknin er kölluð iBrain en hún nemur heilabylgjur og heilastarfsemi af mikilli nákvæmni. Það er síðan sérstakur hugbúnaður sem færir gögnin yfir í mál.

Vísindamennirnir líkja þessu við að brjótast inn í heila Hawkings.

Niðurstöður tilraunanna verða kynntar í Cambridge í næsta mánuði en Hawking mun mögulega mæta á staðinn og sýna tæknina í verki.