Hlunnindagreiðslur heitt efni

Tvær þingsályktunartillögur hafa verið lagðar fyrir Kirkjuþing 2012 er varða hlunnindi presta af kirkjujörðum.

Í annarri er lagt til að allar tekjur af hlunnindum kirkjujarða renni óskiptar til kirkjumálasjóðs, en ekki þeirra sem sitja jarðirnar.

Í ályktuninni segir að öllum ákvæðum haldsbréfa fyrir prestssetur um hlunnindi verði sagt upp frá og með 1. janúar 2013, með árs fyrirvara.

Önnur ályktun um hlunnindi var lögð fram af Birnu G. Konráðsdóttur, sem á sæti í kirkjuráði. Þar segir að kirkjuráð skuli láta vinna skýrslu þar sem öll þau hlunnindi koma fram er kirkjujarðir bera, hvort sem þau tengjast vinnuframlagi eða ekki.

Fréttablaðið fjallaði um málið á dögunum, þar sem kom meðal annars fram að hlunnindi presta vegna laxveiðitekna geti skipt milljónum króna á ári. Engin skrá yfir greiðslur er þó til á Biskupsstofu, en unnið er að gerð slíkrar skrár. Báðum málum var vísað til fjárhagsnefndar á Kirkjuþingi.

- sv