Fámennt í þingsölum vegna prófkjörsslaga

Þingnefndarformaður kvartar yfir því að illa gangi að manna nefndarfundi og atkvæðagreiðslur um mikilvæg mál. Þingmenn séu uppteknir í prófkjörum. Skrifstofustjóri Alþingis segir eðlilegt að prófkjörin taki tíma hjá þingmönnum.

Prófkjör og forvöl stjórnmálaflokkanna eiga hug margra þingmanna þessa dagana og hefur borið á því að illa gangi að manna nefndarfundi af þeim sökum. Þá hefur verið fámennt í þingsal og þurft að ganga eftir því að nægilega margir þingmenn séu til að afgreiða mál.

Fjáraukalög voru samþykkt til þriðju umræðu á þriðjudag. Það er í raun mikilvægasta atkvæðagreiðslan í ferli málsins því eftir aðra eru samþykktar stærstu breytingarnar sem þingið vill gera á frumvarpinu. Venjan er sú að veigaminni breytingar eru gerðar við þriðju umræðu.

Fjáraukalögin voru samþykkt með 23 atkvæðum stjórnarliða. Stjórnarandstæðingar, 22 talsins, sátu hjá, en 18 voru fjarstaddir. Venju samkvæmt fellir stjórnarandstaða ekki fjárlög og fjáraukalög, en hún hefði ekki þurft miklar tilfæringar til þess í gær, þar sem aðeins munaði einu atkvæði.

Björn Valur Gíslason, formaður fjárlaganefndar, segir þetta bagalegt þegar kemur að jafnstóru máli og fjáraukalögum.

„Það er náttúrlega ekki boðlegt ef það þarf að fara að grátbiðja fólk um að koma og greiða atkvæði og taka þátt í umræðum, jafnvel þó menn séu að reyna að hafa fyrir því að komast inn á þing. Menn verða þá að vera þar líka. Þetta þætti ekki gott til eftirbreytni á öðrum vinnustöðum.“

Helgi Bernódusson, skrifstofustjóri Alþingis, segir að reynt sé að tímasetja mikilvægar atkvæðagreiðslur vel og allar atkvæðagreiðslur séu auglýstar með fyrirvara. Stundum sé hins vegar strembið að ná tilskildum fjölda í salinn. Það sé hins vegar misskilningur að vinnustaður þingmanna sé bundinn við þingsalinn.

„Hann er líka í þingflokkum og alls konar öðrum erindagjörðum, þannig að þetta er ekkert bundið núna við prófkjör eða neitt slíkt. En það er auðvitað ljóst að þau taka mikla athygli frá mönnum og skárra væri það nú.“

Ljóst sé hins vegar að prófkjörin hafi áhrif.

„Það hefur auðvitað verið þannig undanfarna daga, undanfarnar tvær vikur, að það hefur borið á því að ekki hefur verið margt í þingsalnum og maður veit svo sem alveg hver skýringin er. Þetta er þó ekki neitt sem maður gæti kallað óeðlilegt.“kolbeinn@frettabladid.is