Fangelsin í Prag engin paradís

„Ég veit bara um einn Íslending sem hefur setið inni hérna í Prag, í öðruvísi fangelsi. Hann sagði að þetta væri engin paradís," segir Þórir Gunnarsson, ræðismaður Íslands í Tékklandi, um aðbúnað í þarlendum fangelsum. Tvær átján ára íslenskar stúlkur sitja nú í gæsluvarðhaldi í Prag eftir að kókaín í kílóavís fannst í farangri þeirra við komuna þangað í síðustu viku.

Til stóð að Þórir fengi að hitta stúlkurnar í gær en það gekk ekki eftir. „Yfirlögregluþjónninn sem sér um málið vill ekki að neinn tali við þær á meðan það liggur ekki fyrir nákvæmlega hvaða efni þetta var og hversu mikið magn," segir Þórir.

Fyrstu fréttir hermdu að í töskunum hefðu verið átta kíló, en það mun samkvæmt upplýsingum Fréttablaðsins vera orðum aukið. Líklega séu kílóin ekki nema um þrjú.

Lögreglunni í Prag þykir ljóst að smyglið hafi verið þaulskipulagt af vönum glæpamönnum. Það megi meðal annars sjá á því hversu rækilega efnin voru falin í töskunum.

Stúlkurnar voru úrskurðaðar í sjö mánaða gæsluvarðhald en gætu sloppið út eftir þrjá ef þær eru samvinnuþýðar.

Þórir segir stundum koma fyrir að Íslendingar þurfi að gista fangaklefa í eina nótt eða tvær í Prag. Maðurinn sem hann hafi hitt í vor hafi setið inni í rúman mánuð, en enginn hafi verið eins lengi og stúlkurnar horfa nú fram á.

„Þetta er bara ömurlegur staður. Alls staðar er vont að vera í fangelsi en þetta eru engin Norðurlönd. Þú ferð ekkert í skóla eða líkamsrækt," segir ræðismaðurinn. - sh