Umferðarljós við Hörpu valda töfum

Reykjavíkurborg hafa borist kvartanir vegna umferðarljósanna við tónlistarhúsið Hörpu.

Ljósin, sem eiga að vera umferðar- og viðburðastýrð, eru staðsett þannig að þau eru ekki nægilega samstillt og geta því valdið töfum á bílaumferð á háannatímum.

Stefán Finnsson, hjá umhverfis- og samgöngusviði Reykjavíkurborgar, segir ekki standa til að breyta ljósunum.

„Þau hafa ekki verið í bylgju svo menn stoppa nokkuð oft," segir Stefán.

„En það er ekki einfalt mál að stilla þau svo þau fungeri vel, því hámarkshraðinn er svo mismunandi á þessum stutta kafla."

Þá bendir Stefán einnig á að umhverfið í miðbænum sé að breytast og meiri áhersla sé lögð á gangandi vegfarendur.

„Við erum að einbeita okkur að tryggja það flæði og að það sé öruggt," segir hann. „Þá líður bílaumferðin fyrir það. En það þarf bara að sýna því þolinmæði."- sv