Kippur í sölu byggingarkrana

Þýska fyrirtækið Rueko GmbH hefur keypt 60 prósenta hlut í fyrirtækinu Hýsi – Merkúr, sem flytur meðal annars inn byggingarkrana og vinnuvélar. Kaupin, ásamt uppbyggingu nýrra höfuðstöðva, kosta þýska fyrirtækið hundruð milljóna króna.

„Það er ekki kominn blússandi gangur í þennan bransa, en þetta er að færast í rétta átt,“ segir Ómar Einarsson, framkvæmdastjóri véladeildar Hýsis – Merkúrs. Félagið flytur inn byggingarkrana og vinnuvélar frá þýska fyrirtækinu Liebherr.

Frá hruni hefur fyrirtækið selt fjölda byggingarkrana úr landi, en nú segir Ómar að viðsnúningur sé að verða. Hann segir að þegar séu komnar pantanir fyrir nokkra byggingarkrana, og fyrirtækið hafi afhent stóra gröfu nýverið til verktaka sem ákveðið hafi að fjölga tækjum.

„Hugarfarið er að breytast, það er meiri bjartsýni, menn eru að sjá einhver verkefni í pípunum,“ segir Ómar. Hluti af ástæðunni gæti verið að mikill fjöldi vinnuvéla hefur verið fluttur úr landi eftir hrun, þegar byggingariðnaðurinn hrundi. Ómar segir komna þörf á að endurnýja sum af þeim tækjum sem eftir hafi setið hér á landi.

Knútur G. Hauksson, forstjóri Kletts, segist merkja uppsveiflu í sölu vörubíla frá árunum eftir hrun, enda flotinn að eldast og mikil þörf á að endurnýja bíla. Hann segir að salan sé þó ekki orðin eins og í meðalári. Nú sé fyrirtækið að selja á þriðja tug bíla á ári. Í eðlilegu árferði, áður en bólan náði hámarki, hafi selst á bilinu 50 til 60 vörubílar hjá Kletti.

Knútur segist ekki sjá uppsveiflu í sölu á gröfum. Nú seljist fimm til sex á ári, en ekki 40 til 70 eins og áður. Minni þörf sé á endurnýjun þeirra enda hafi verktakar haft fá verkefni fyrir tækin á undanförnum árum. - bj