Frágangur vegriða víða dauðagildra

Frágangi vegriða á Íslandi er mjög ábótavant að mati Ólafs Guðmundssonar, fulltrúa EuroRAP á Íslandi. Sé ekki rétt gengið frá þeim geta þau verið dauðagildra. Stjórnvöld fylgjast ekki nógu vel með þróuninni í nágrannalöndunum.

Frágangur á vegriðum á Íslandi er ófullnægjandi að mati eftirlitsaðila EuroRAP á Íslandi. „Hér á Íslandi eru vegriðsendar látnir ganga ofan í jörðina. Sums staðar erlendis er þessi frágangur bannaður,“ segir Ólafur Guðmundsson, fulltrúi EuroRAP á Íslandi.

EuroRAP er verkefni regnhlífarsamtaka bifreiðaeigendafélaga í Evrópu og gengur út á að hafa eftirlit með vegum og sjá til að þeir séu í samræmi við evrópsk viðmið.

Vegriðum er komið fyrir við þjóðvegi þar sem sérstök hætta steðjar að vegfarendum í umhverfi vegar. Vegrið eru til dæmis reist við brýr, utan um krappar beygjur og milli vegar og mikils bjargs eða fjallshlíðar.

„Nýlegt dæmi um slys þar sem vegrið gengur ofan í jörðina er þegar bíll ók upp á vegrið og endaði úti í Laxá á Ásum. Ástæðan fyrir því að Bretar bönnuðu svona frágang var að þar voru fimm ungmenni í bíl sem fór upp á svona enda. Bíllinn flaug svo hátt upp í loftið að hann lenti undir brúargólfi og afhausaði farþegana. Þá sögðu Bretar hingað og ekki lengra.“

Ólafur segist vita um nokkur íslensk dæmi um banaslys vegna þess að bílar hafi farið í loftköstum út fyrir veg og jafnvel endað í ám.

Um ástæður þess að ástandi vegriða á Íslandi sé ábótavant segir Ólafur einfaldlega að andvaraleysi stjórnvalda sé um að kenna. Það sé virkilega bagalegt þar sem umferðarslys orsaka flest ótímabær andlát hér á landi.

„Menn eru ekki að fylgjast nógu vel með. Það vantar kröfurnar hér og stefnuna í þessum málaflokki,“ segir Ólafur. „Það má ekki flytja inn bíl nema hann uppfylli allar kröfur og það sama er með brauðristir. Það er allt í lögum. Það er hins vegar ekkert í lögum um hvernig vegir eiga að vera. Það eru fullt af stöðlum um ljósastaura, vegrið og yfirborðsmerkingar og allt þetta dót. En það stendur hvergi í lögum að það eigi að fara eftir þessu. Vegagerðinni er bara sagt: „Smíðið hér veg og ekki eyða peningum í hann.““

Ólafur vill þó líka benda á framkvæmdir sem standast kröfur. „Allt sem er gert í Reykjavík í dag er í lagi. En það eru úti um allt land kolvitlausir endar og meira að segja endar sem ganga beint út í loftið. Það má til dæmis finna þannig á Gullinbrúnni.“

„Ísland er þróunarland í vegagerð,“ segir Ólafur enn fremur og bendir á að fólk verði að átta sig á að litlu hlutirnir skipti líka máli. „Það er alltaf verið að tala um það stóra eins og að grafa göng eða byggja stór mannvirki.“birgirh@frettabladid.is