Veiðigjöld afgreidd en stjórnunin bíður

Samkomulag náðist um þinglok á milli formanna stjórnmálaflokkanna í gær. Það felur í sér samþykkt veiðigjalds, með þónokkrum breytingum, og að frumvarpi um fiskveiðistjórnun verði frestað, sem og þingsályktunartillögu um rammaáætlun um vernd og nýtingu náttúrusvæða. Þessi voru þrjú stóru mál ríkisstjórnarinnar á vorþinginu.

Til stóð að samþykkja frumvarp um veiðigjöld í gærkvöldi. Gjaldið verður 12,7 til 13,7 milljarðar og ef það fer yfir 13,8 milljarða verður greitt til baka sem því nemur. Það verður á fjórum gjalddögum og miðast við kvótaárið, en það stendur frá 1. september til 31. júlí.

Sérstakur samráðshópur mun fara yfir áhrif veiðigjaldanna, en þau verða aðeins samþykkt til eins árs. Þá verður framhaldið metið.

Framsóknarflokkurinn fór fram á að samkomulag um þinglokin yrði formlega undirritað. Sigmundur Davíð Gunnlaugsson, formaður Framsóknarflokksins, segist ánægður með samkomulagið, úr því sem komið var.

„Við hefðum viljað sjá mat á því hvaða áhrif hækkun veiðigjalds hefur, en það gekk ekki eftir. Áfram verður þó unnið að málum í sumar og haust og ef forsendur breytast er mögulegt að taka á því.“

Frumvarp um stjórn fiskveiða frestast fram á næsta þing. Í samkomulaginu er einnig tekið á umdeildum atriðum í því, svo sem 40/60 regluna. Í henni felst að fari þorskkvóti yfir 202 þúsund tonn gangi 40% af honum til ríkisins en útgerðin fái 60%.

Sigmundur segir að með samkomulaginu hafi náðst ákveðinn stöðugleiki. „Menn vita þá nokkurn veginn hvar þeir standa með kerfið. Í samkomulaginu felst einnig að þau atriði sem helst höfðu verið gagnrýnd af sérfræðingum, og öðrum sem skiluðu umsögnum, detta út.“

Steingrímur J. Sigfússon, ráðherra sjávarútvegsmála, segir að um tímamótamál sé að ræða. Vissulega sé verið að fara vægar af stað en færa mætti rök fyrir að sjávarútvegurinn þoli, en meira tillit sé tekið til skuldugra fyrirtækja.

Hann segir það vissulega vonbrigði að fiskveiðistjórnunin hafi ekki náðst í gegn.

„Jú jú, en það er þó verið að reyna að setja það í farveg og við skulum sjá hverju það skilar. Að sjálfsögðu hefði maður viljað klára allan pakkann og það er vaxandi stuðningur við að það sé gert.“kolbeinn@frettabladid.is