Aldrei meira fuglalíf í Vatnsmýri

Gróðurhús sem stendur fyrir utan Norræna húsið var formlega opnað á dögunum. Úr húsinu er gott útsýni yfir Vatnsmýrina en þaðan gefst fólki kostur á að skoða fuglalífið í mýrinni.

Gróðurhúsið verður opið í allt sumar, en þar er aðbúnaður fyrir fólk með nesti og sjónaukar fyrir þá sem vilja skoða fuglana. Einnig er vefmyndavél í mýrinni þannig að fólk geti fylgst með fuglunum heiman frá sér.

Í sumar stendur Norræna húsið svo fyrir fuglaskoðunarferðum um svæðið á laugardögum og tónleikaröð við gróðurhúsið sem hefst 21. júní.

Miklar framkvæmdir hafa staðið yfir í Vatnsmýrinni frá því í vor, en þá hófst vinna við að endurheimta votlendi á svæðinu. Háskóli Íslands, Norræna húsið og Reykjavíkurborg stóðu að þeirri framkvæmd.

Fyrir framkvæmdir var ástandið í mýrinni talið slæmt, enda hafði fuglalífi hrakað mikið á síðustu áratugum vegna ágengra plantna og mengunar frá flugvellinum. Strax í ár, nokkrum mánuðum eftir fyrstu framkvæmdirnar, hefur fuglalífið tekið við sér og tegundir eins og tjaldur og kría eru byrjaðar að láta sjá sig. - ktg