Olíuvinnsla skal háð ströngustu reglum

Olía verður ekki unnin á Drekasvæðinu fyrr en að uppfylltum ströngustu umhverfisreglum, og vinnsla mun ekki hefjast áður en allur nauðsynlegur öryggisbúnaður vegna mengunaróhappa er til staðar í landinu.

Íslendingar geta búist við því að upp úr 2025 verði þrjú olíusvæði norðan Íslands; á Drekasvæðinu, út af Austur-Grænlandi, og við Jan Mayen. Íslensk stjórnvöld stefna að því að byggja upp þjónustu á Norðurlandi við öll olíusvæðin þrjú.

Þetta kom fram í erindi Össurar Skarphéðinssonar utanríkisráðherra á morgunverðarfundi Arion banka um Drekasvæðið og hugsanlega olíuvinnslu Íslendinga.

Össur er bjartsýnn á olíufund á Drekasvæðinu, en mestum tíma varði hann til að lýsa þeirri skoðun sinni að, þrátt fyrir lofandi efnahagsleg áhrif á íslenskt samfélag, þá skyldi umhverfið njóta vafans. „Það sem gerðist í Mexíkóflóa var stórslys. Slys af sömu stærðargráðu á einu af þessum þremur svæðum norðan Íslands yrði hins vegar slys af allt annarri og hrikalegri stærðargráðu.“

Össur útskýrði ástæðuna fyrir þessari fullyrðingu sinni. Í köldum sjó brotnar olía seint og illa niður og umhverfisáhrifin því mun meiri í okkar heimshluta. Fyrir Ísland er hættan sú sama, hvar sem slys yrði, þar sem straumrastir bera olíuna að ströndum Íslands óháð staðsetningu.

Varðandi uppbyggingu þjónustu á Íslandi fyrir olíusvæðin þrjú upplýsti utanríkisráðherra að hann hefði þegar átt formlegar viðræður við Kuupik Kleist, forsætisráðherra Grænlendinga, um samstarf. Sömuleiðis hefði málið verið tekið nýlega upp í samræðum milli hans og Jonasar Gahr Störe, utanríkisráðherra Noregs, og þeir orðið sammála um að taka málið upp í opinberri heimsókn Össurar til Noregs síðar á árinu.

Össur leggur þunga áherslu á samvinnu þjóðanna þriggja en hann kvað það jafnframt farsælast fyrir Íslendinga, komi til vinnslu á Drekanum, að í framtíðinni verði settur á fót Auðlindasjóður að fyrirmynd Norðmanna, og sagði það sérstaklega nauðsynlegt til að tryggja að hugsanlegur afrakstur af olíuvinnslu á næsta áratug leiði ekki til ójafnvægis og ofhitnunar í íslenska hagkerfinu.svavar@frettabladid.is