Vill peysurnar heim

Lagalega séð skiptir engu máli hvar íslenskar lopapeysur eru framleiddar, bara ef merkingarnar eru réttar og ekki villandi. Ásmundur Einar Daðason telur mikilvægt að íslenskar lopapeysur verði framleiddar á Íslandi.

Íslenskum framleiðendum í textílgeiranum, sem láta framleiða vörur sínar erlendis, er ekki skylt að láta merkja vörur sínar með upprunalandi.

Þórunn Anna Árnadóttir, sviðsstjóri neytendaréttarsviðs hjá Neytendastofu, segir hins vegar mikilvægt að þær upplýsingar sem fylgi vörunum séu réttar. Villandi merkingar varði við lög.

„Það gildir almennt um vörur, hvort sem það er textíll eða eitthvað annað, að ef fólki er talin trú um að varan sé framleidd annars staðar, getur verið um villandi viðskiptahætti að ræða.“

Í kjölfar frétta Fréttablaðsins um merkingar á íslenskum lopapeysum, ætlar Neytendastofa að skoða merkingar á peysunum og í framhaldi ákveða hvort málið verði tekið til frekari meðferðar.

Ásmundur Einar Daðason, þingmaður Framsóknarflokksins, segir mikilvægt að íslenskar lopapeysur séu framleiddar hérlendis.

„Íslenska lopapeysan á náttúrulega að vera framleidd á Íslandi. Menn eiga ekki að vera að fara í kringum þetta og reyna með óljósri markaðssetningu að auglýsa íslenska vöru sem ekki er framleidd á Íslandi.“

Ásmundur segist ætla að kanna málið frekar.

„Ég er að láta skoða þetta með lögfræðingum þingsins og vil athuga hvort það sé með einhverjum hætti hægt að skerpa á reglunum í kringum þetta,“ segir Ásmundur.

Ásmundur er ósáttur við að lopapeysurnar séu framleiddar erlendis.

„Íslenska lopapeysan er eitt helsta auglýsingamerki okkar Íslendinga. Þetta er íslensk hönnun, framleidd á Íslandi með aldagamla íslenska sögu og gerð af íslenskum konum til bæja og sveita.“

„Mér finnst það miður að menn skuli vera komnir á þá braut að vera að láta framleiða þetta í Kína og skuli þar með hverfa frá þeirri hugsun sem hefur verið á bak við þetta síðustu áratugi,“ segir Ásmundur. katrin@frettabladid.is