Verktaki segir komið til móts við borgina

Kári Arngrímsson, forstjóri Atafls, segir ekki rétt að verktakafyrirtækið hyggist byggja fjölbýlishús á Mýrargötu 26 eftir sömu teikningum og samþykktar voru hjá Reykjavíkurborg árið 2006.

Í Fréttablaðinu á fimmtudag sagði frá því að aðeins neðsti hluti hússins á Mýrargötu hefði verið steyptur þegar kom að hrunárinu 2008. Haft var eftir Ástu Olgu Magnúsdóttur tölvunarfræðingi, sem er andvíg byggingu háhýsis á lóðinni, að fulltrúar borgarinnar hafi reynt að semja við lóðarhafann um að lækka húsið í fimm hæðir en lóðarhafinn hafi á endanum ákveðið að halda sig við samþykkta teikningu og hafa húsið sjö hæðir.

?Áætluð og samþykkt hús á lóðinni er átta hæðir en ekki sjö,? bendir Kári Arngrímsson hins vegar á. ?Allt frumkvæði varðandi breytingar á húsinu hefur komið frá Atafli ekki borginni. Samstarfið var gott og lagðar fram nokkrar tillögur sem hafa fengið umfjöllun hjá skipulaginu. Á endanum var lögð fram ákveðin málamiðlun sem hafði ákveðnar breytingar á deiliskipulagi í för með sér en borgin var ekki tilbúin að samþykkja deiliskipulagsbreytinguna.?

Þá segir Kári ekki rétt sem fram kom í fréttinni á fimmtudag að Atafl hafi átt Mýrargötu 26 áður en Landsbankinn eignaðist fasteignina eftir hrunið. Lóðin hafi verið í eigu Nýju Jórvíkur ehf. sem unnið hafi að verkefninu frá árinu 2001. Upphaflega hafi átt að endurbyggja gömlu Hraðfrystistöðina.

?Í mörg ár á undan var húsið aðsetur útigangsfólks. Jafnframt var reglulega kveikt í húsinu með tilheyrandi vandamálum. Atafl var með verksamning um byggingu hússins en fékk ekki greitt fyrir framkvæmdir síðustu þrjá mánuðina enda kom bankahrunið í framhaldinu og Nýja Jórvík fór í gjaldþrot,? segir forstjóri Atafls og kveður fyrirtæki sitt einfaldlega hafi boðið best þegar Reginn, eignarhaldsfélag Landsbankans, auglýsti Mýrargötu 26 til sölu í fyrra.

?Nú er verið að endurhanna húsið innan gildandi deiliskipulags þar sem mikið hefur verið tekið tillit til sjónarmiða borgarinnar um lækkun hússins og að efstu hæðir hússins verði inndregnar að hluta. Á almennum kynningarfundum meðal áhugasamra kaupanda hafa fagaðilar hrósað fyrirhugðum breytingum og sagt að húsið sé orðið mjög glæsilegt,? segir Kári og hafnar jafnframt fullyrðingum um að húsið muni verða í ósamræmi við byggðina í kring.

?Rétt er að benda á gildandi deiliskipulag fyrir hafnarsvæðið. Hæð hússins við Mýrargötuna verður fjórar hæðir og rétt að nefna að 1 hæð hússins er bílastæðahús auk bílakjallara þar undir. Einnig stendur húsið við hliðina á húsi CCP sem er fimm hæða hátt,? segir forstjóri Atafls.

gar@frettabladid.is