Viðræður um fjármögnun hefjast í næstu viku

Formlegar viðræður um fjármögnun Hverahlíðarvirkjunar hefjast í næstu viku. Að sögn Ingvars Stefánssonar, fjármálastjóra Orkuveitunnar, hafa óformlegir fundir átt sér stað frá því stjórn Orkuveitunnar veitti í lok apríl umboð til að hefja viðræðurnar.

Ramminn í mögulegu eignarhaldi virkjunarinnar hefur legið fyrir í nokkurn tíma, en stefnt er að svokallaðri verkefnafjármögnun með aðkomu lífeyrissjóða. Gert er ráð fyrir að Orkuveitan leggi til félags um virkjunina þá fjárfestingu sem þegar hefur verið lagt í vegna hennar. Virkjunin er forsenda þess að Orkuveitan fái staðið við orkusamninga vegna álversins í Helguvík.

„Uppleggið er þannig að engin áhætta verði fólgin í verkefninu fyrir Orkuveituna eða eigendur hennar,“ segir Ingvar. Ósamið sé hins vegar um allar stærðir, svo sem varðandi arðsemi og kostnað.

„Við gefum okkur ákveðinn tíma í samningslotu núna, svona fram á mitt sumar,“ segir hann, en gerir um leið ráð fyrir því að heldur lengri tíma taki að koma á endanlegum samningi.

„Ég reikna með að þetta geti tekið að minnsta kosti hálft ár,“ segir hann.

Áður hefur komið fram að stjórn Orkuveitunnar geri ráð fyrir því að fullgerð virkjun gangi til baka til Orkuveitunnar í lok samningstímans. - óká