Gamla lánið er enn hagstæðast

Stjórn Faxaflóahafna hafnar öllum átta tilboðunum sem bárust í endurfjármögnun á langtímaláni. Að sögn Gísla Gíslasonar hafnarstjóra var umrætt lán tekið árið 2006 til tuttugu ára. Það stendur í dag í um 1.200 milljónum króna. Vextirnir eru 4,6 prósent auk verðtryggingar.

„Við vorum og erum að skoða valkosti varðandi endurfjármögnun á langtímaláni fyrirtækisins. Niðurstaðan er að hafna þeim boðum sem bárust,“ segir Gísli sem kveður lánið frá 2006 í sjálfu sér ágætt. „En það er alltaf efni til að leita eftir betri kjörum ef þau eru í boði.“ - gar