ESA skýrir samkeppnisreglur sínar

ESA, eftirlitsstofnun EFTA, hefur tekið upp nýjar reglur sem skýra eiga hvenær samkeppnisaðilar mega eiga í samstarfi og hvers lags samráð rúmist innan ramma Samningsins um evrópska efnahagssvæðið.

„Samstarf samkeppnisaðila getur haft neikvæð áhrif á neytendur og dregið úr samkeppni,“ segir í tilkynningu ESA í gær. „Hins vegar geta samlegðaráhrif slíkrar samvinnu í mörgum tilvikum leitt til lægra vöruverðs, aukins úrvals og betri varnings, neytendum til hagsbóta.“

Nýju reglurnar eru sagðar hjálpa til við að koma í veg fyrir samráð sem leiðir af sér hærra vöruverð og færri valkosti eða minni nýsköpun og ýta um leið undir samvinnu sem hefur í för með sér framfarir og efnahagsbata. „Stofnunin telur nýju reglurnar aðgengilegri fyrir notendur og útvegar fyrirtækjum á markaði nauðsynlega leiðsögn um hvers konar samráð er heimilt,“ segir í tilkynningu ESA. Nýju reglurnar eru aðgengilegar á vef stofnunarinnar.

- óká