Eiga 25.000 skópör á lagernum

Ný íþróttavöruverslun undir merkjum Sports Direct opnar við Smáratorg í Kópavogi á laugardag. Sports Direct er stærsta íþróttaverslanakeðja Bretlands og er í eigu auðkýfingsins Mikes Ashleys.

Sigurður Pálmi Sigurbjörnsson er framkvæmdastjóri Sports Direct á Íslandi og segir tilkomu þeirra munu breyta nokkru á íslenskum markaði.

„Við ætlum að reyna að lækka verð á íþróttavörum hér á landi og þar er kominn tími til. Við stefnum að því að verða með mjög samkeppnishæf verð.“

Allar vörur verða keyptar beint af lager Sports Direct í Bretlandi.

Verslunin verður að forskrift móðurfyrirtækisins og eru starfsmenn frá Bretlandi nú að leiðbeina við uppsetningu.

Sigurður Pálmi segir þessa verslun geta markað upphafið að frekara samstarfi við Sports Direct um verslanir á Norðurlöndum ef vel tekst upp hér á landi. Hann er bjartsýnn á góðar móttökur.

„Ég held að Íslendinga þyrsti í eitthvað nýtt og meiri fjölbreytni,“ segir Sigurður Pálmi og segir að væntanlegir viðskiptavinir megi vænta hagstæðs verðs og mikils úrvals.

„Við erum til dæmis með 25.000 skópör sem við erum að koma fyrir fyrir opnunarhelgina þannig að allir ættu að geta fundið eitthvað við sitt hæfi.“

- þj