"Starfsfólk í skólamötuneytum kaupir almennt hollan og góðan mat“

Inga Lind Karlsdóttir fór á dögunum og lét rannsaka næringargildi í skólamáltíð í Salaskóla í Kópavogi og komst að þeirri niðurstöðu að skyndibitamatur væri hollari.

Elsa Yeoman, forseti borgarstjórnar Reykjavíkurborgar, telur ólíklegt að slík óhollusta sé gegnumgangandi í skólum landsins. „Þó þetta hafi verið svona í einum skóla einn dag er það ekki endilega þannig í öllum skólum alltaf," segir Elsa.

Hún bendir sömuleiðis á öfgana í því að ein kona geti farið einn dag og rannsakað næringargildi í einni skólamáltíð í einum skóla og byggt svo á þeim niðurstöðum í heimildaþætti um matarvenjur Íslendinga.

Hún segist ekki vita nákvæmlega hvað starfsfólk í skólum býður börnunum uppá. Borgin hefur ekki neina ákveðna stefnu í þessum efnum. Hver kokkur ákveður í raun hvað hann býður börnunum uppá. Elsa segir hins vegar að starfsfólk í skólamötuneytum sé upp til hópa frekar skynsamt fólk sem kaupir inn hollan og góðan mat.

Rannveig H. Ásgeirsdóttir, formaður skólanefndar Kópavogsbæjar, sagði að þennan ákveðna dag þegar Inga Lind heimsótti Salaskóla hafi kokkurinn einmitt verið veikur.

„Inga Lind var búin að sigta þennan eina dag út og kom þá í skólann," segir Rannveig. Hún lítur svo á að almennt sé skólamatur hollari en niðurstöður Ingu gefi til kynna.