Ók á tengikassa og slökkti ljósin

Ökumaður bifreiðar í Keflavík missti stjórn á bílnum með þeim afleiðingum að hún hafnaði á tengikassa. Atvikið varð með þeim hætti að bifreiðin rann til að aftan samkvæmt tilkynningu frá lögreglu.

Við það kom fát á ökumanninn sem steig á bensínið í stað bremsunnar. Þegar tengikassinn varð fyrir högginu sló rafmagni út á ljósastaurum á stóru svæði í bænum.

Starfsmenn frá HS Veitum komu ljósunum skömmu síðar í lag. Allnokkurt tjón varð af völdum óhappsins því tengikassinn með því sem í honum er kostar á fjórða hundrað þúsund krónur.

Annar ökumaður ók um helgina á hlið við Seltjörn. Mikil hálka var þegar óhappið átti sér stað.