Öryggi lögreglumanna stefnt í hættu

Öryggi lögreglumanna er stefnt í hættu, segir Jón Gunnarsson, þingmaður Sjálfstæðisflokksins. Hann spurði Ögmund Jónasson innanríkisráðherra um skýrslu sem unnin var í ráðuneytinu um stöðu lögreglunnar. Hann segir að í skýrslunni sé dregið fram hversu veik lögreglan í landinu sé orðin. „Við þessu verður að bregðast og ábyrgð Alþingis er gríðarlega mikil í þessu máli," segir Jón. Hann spurði á Alþingi í dag hvort Ögmundur myndi taka málið upp á Alþingi.

„Þessi skýrsla er ekki neitt leyniplagg, enda fór það svo að þegar háttvirtur þingmaður óskaði eftir því í morgun að fá eintak í hendur þá fékk hann það," segir hann. Ögmundur sagði að nauðsynlegt hefði verið að bregðast við fjárlagahallanum eftir efnahagshrunið. Nauðsynlegt hefði verið að grípa bæði til skattahækkana og niðurskurðar.

Ögmundur sagði að lögreglan hefði ekkert farið varhluta af þessari skerðingu. „Skerðingin nemur hjá flestum stofnunum á milli fimmtungi og fjórðungi. Auðvitað kemur það niður á allri þeirri starfsemi sem í hlut á," sagði Ögmundur.