Frábærar aðstæður til að skauta á Reykjavíkurtjörn

Í dag eru frábærar aðstæður til skautaiðkunar á Tjörninni í Reykjavík. Tjörnin er lögð spegilsléttum ísi eftir logn undanfarinna daga, segir á vefsíðu Reykjavíkurborgar.

„Skautafólk og aðrir vegfarendur eru þó beðnir um að gæta sín á ótraustum ís og fara ekki of nálægt vökum við Iðnó. Vel spáir til skautaiðkunar á Tjörninni þessa vikuna. Þó er spáð 2 °C hita í Reykjavík á morgun en frost mun herða eftir því sem líða tekur á vikuna," segir á vefsíðunni.

Reykjavíkurborg vill minna fólk á að fara varlega og ekki tefla í neina tvísýnu ef ísinn virðist ótraustur.