Heimaey fékk stærsta síldarkast sögunnar

Fjölveiðiskipið Heimaey frá Vestmannaeyjum fékk risakast af síld upp á tvö þúsund tonn í Breiðafirði í fyrradag, sem er að líkindum stærsta kast sem íslenskt skip hefur fengið til þessa.

Þetta var mikið meira en rúmaðist í skipinu, þegar kastið fékkst, og fengu þrjú skip, Hákon, Vilhelm Þorsteinsson og Kap, að dæla umfram aflanum um borð til sín, eða samtals 800 tonnum, en það magn þætti mjög gott kast.

Veiðarnar ganga vel og er Eyjaflotinn rösklega hálfnaður með kvóta sinn á vertíðinni og skip HB Granda eru búin með kvóta sinn.