Þingið setji reglur um slit þrotabúanna

Bjarni Benediktsson, formaður Sjálfstæðisflokksins segir það vera skýlausa kröfu að þingið hafi um það lokasvar hvernig reglum um útgreiðslur úr þrotabúum verði háttað. Til stendur að gera nauðasamninga öðru hvoru megin við áramót.

„Við erum að tala um útgreiðslu gjaldeyris upp á hundruð milljarða," segir Bjarni. Málið sé því gríðarlegt hagsmunamál fyrir Íslendinga. „Það er algjörlega skýlaus krafa að þingið verði ekki bara upplýst heldur verið með í ráðum og hafi um það lokasvarið hvernig málum verði háttað," bætti Bjarni við. Hann spurði Jóhönnu Sigurðardóttur forsætisráðherra því um það hvernig þingið myndi koma að málinu.

„Ég er sammála því sem fram kemur í máli háttvirts þingmanns, hve mikilvægt það er að það sé farið skynsamlega í afnám haftanna og útgreiðslur þrotabúanna," segir hún. „En ég held að við höfum alveg tök á þessum máli," sagði hún. Hún sagði að Seðlabankinn myndi stýra reglum um það hvernig farið verið með útgreiðslur úr bönkunum, en var sammála því að þingið þyrfti að fylgjast vel með ferlinu.

Bjarni var ósáttur við svar Jóhönnu og sagði að það væri algjörlega óásættanlegt að einn maður, seðlabankastjóri, hefði málið í höndum sér.