Mengað vatn á Eskifirði - getur valdið niðurgangi

Kólígerlar hafa fundist í neysluvatni á Eskifirði og eru íbúar í bænum beðnir um að sjóða allt neysluvatn. Tekið var sýni úr vatnsbóli bæjarins í gær og bárust niðurstöðurnar í morgun. Helga Hreinsdóttir, framkvæmdarstjóri Heilbrigðiseftirlits Austurlands, segir að búið sé að bera bréf í öll hús í bænum þar sem íbúum er tilkynnt um þetta.

Vatnsból Eskfirðinga samanstendur af nokkrum lindum í fjallinu við bæinn en þær eru viðkvæmari fyrir leysingum en til dæmis borholur. Nú er verið að tengja varavatnsból, sem staðsett er inn í dal, við krana bæjarins og verður þeirri aðgerð líklega lokið á næstu dögum.

Íbúar eru beðnir um að sjóða allt neysluvatn, en það er þó í lagi að baða sig upp úr vatninu og sjóða kartöflur, segir Helga.

Þetta er ekki í fyrsta skiptið sem kóligerlar mælast í neysluvatni á Eskifirði, að sögn Helgu. Sumir stofnar kólígerla mynda eiturefni sem getur valdið niðurgangi og þá geta þeir einnig valdið matarsýkingum.