Hrafnhildur þögul um meiðslin: Ég er nokkuð sátt

Hrafnhildur Lúthersdóttir var ánægð með frammistöðu sína í 200 m bringusundi á Ólympíuleikunum í London í morgun þrátt fyrir að hafa verið um tvær og hálfa sekúndu frá sínu besta.

Hrafnhildur synti á 2:29,60 mínútum en Íslandsmet hennar í greininni er 2:27,11. Það var sett skömmu fyrir Ólympíuleikana en alls hefur hún bætt metið sitt í greininni þrívegis á þessu ári.

Hún hafnaði í þriðja sæti í sínum riðli og alls í 28. sæti af 34 keppendum. Þess má geta að hún náði fimmta sæti á EM í Ungverjalandi í maí síðastliðnum í sömu grein.

„Ég er nefnilega alveg ánægð með þetta miðað við að þetta skuli vera morgunsund og vegna meiðslanna minna. Að komast undir 2:30 var betra en ég bjóst við," sagði hún við Vísi eftir sundið. „Ég er því alveg sátt við þetta."

Fann ekki fyrir meiðslunum

Hrafnhildur meiddist þegar hún datt og bar fyrir sig olnbogann í Frakklandi á dögunum þegar að sundlandsliðið var þar statt í æfingabúðum. „Ég fann sem betur ekki mikið fyrir meiðslunum. Adrenalínið var á fullu og þá finnur maður ekki jafn mikið fyrir því."

„Ég hef fundið fyrir smá óþægindum en ekki það mikið að ég hef ekki getað synt eða æft," segir hún. „Ég hef ekki þurft að taka nein verkjalyf nema íbúfen öðru hvoru. Annars hef ég reynt að nota verkjalyf sem minnst."

Hún vill ekki tjá sig nákvæmlega um meiðslin. „Ég ætla að halda því fyrir sjálfa mig. Þetta er þó ekki það alvarlegt og ég er nokkuð sátt við allt saman."

Fann fyrir stressi

Hún segir það mögulegt að hún hafi ekki útfært sundið nógu vel. „Það getur verið. Ég hefði líka viljað synda 50 metran aðeins hraðar á æfingum í vikunni vegna þess að mér fannst ég hafa misst aðeins þol."

„En þetta var samt miklu betra en ég bjóst við. Þetta voru fyrstu Ólympíuleikarnir mínir og ég viðurkenni fúslega að ég fann fyrir stressi fyrir sundið."

Hún segir að hún hafi ekki farið oft undir tvær og hálfa mínútu í þessari grein á ferlinum, þó svo að hún hafi gert það þrívegis á þessu ári. „Þetta var því fjórði besti tíminn minn frá upphafi og við það er ég sátt."

Hrafnhildur hafnaði í fimmta sæti á Evrópumeistaramótinu á 2:27,92 og var hún þá aðeins hálfri sekúndu frá silfurverðlaunum. 2:27,00 hefðu hins vegar ekki dugað áfram í undanúrslit á leikunum í morgun. Sú síðasta sem komst inn í undanúrslitin í morgun synti á 2:26,94 en það er aðeins 0,17 sekúndum betra en Íslandsmet Hrafnhildar.

„Það eru margar sem eru að fara undir 2:26 á þessum leikum og ég hefði þurft að bæta mig um eina eða tvær sekúndur til að komast eitthvað áfram."