Meirihluti vill kjósa um Evrópusambandið

Rúmur helmingur kjósenda vill að haldin verði þjóðaratkvæðagreiðsla á næstunni til að ákveða hvort halda eigi aðildarviðræðum við Evrópusambandið (ESB) áfram. Þetta er niðurstaða skoðanakönnunar Fréttablaðsins og Stöðvar 2.

Alls sögðust 57,9 prósent þeirra sem afstöðu tóku til spurningarinnar vilja málið í þjóðaratkvæði en 42,1 prósent vildu það ekki. Tillaga um að halda slíka atkvæðagreiðslu var felld á Alþingi á fimmtudag.

Minnihluti stuðningsmanna stjórnarflokkanna vill málið í þjóðaratkvæði, um 20,4 prósent stuðningsmanna Samfylkingarinnar og 46,7 prósent kjósenda Vinstri grænna. Hins vegar vilja um 67,2 prósent sjálfstæðismanna málið í þjóðaratkvæði og 60,4 prósent stuðningsmanna Framsóknarflokksins.

Konur eru almennt hlynntari þjóðaratkvæðagreiðslu en karlar. Um 63,4 prósent kvenna vilja kjósa um framhald aðildarviðræðna en 52,7 prósent karla.

Hringt var í 1.326 manns þar til náðist í 800 manns samkvæmt lagskiptu úrtaki miðvikudaginn 23. maí og fimmtudaginn 24. maí. Þátttakendur voru valdir með slembiúrtaki úr þjóðskrá. Svarendur skiptust jafnt eftir kyni, og hlutfallslega eftir búsetu og aldri.

Spurt var: Á að halda þjóðaratkvæðagreiðslu á næstunni til að ákveða hvort halda eigi aðildarviðræðum við Evrópusambandið áfram? Alls tóku 92,8 prósent þeirra sem náðist í afstöðu til spurningarinnar.

- bj