Óvæntir gestir í för með íslenska Eurovision-hópnum

Svíum er spáð sigri en Íslendingum sautjánda sæti í Söngvakeppni evrópskra sjónvarpsstöðva sem fram fer í kvöld. Tveir óvæntir gestir fá að vera með íslenska hópnum í græna herberginu á stóru stundinni.

Lokakeppni Eurovision hefst eftir sjö tíma og nú rétt fyrir fréttir var íslenski hópurinn staddur í Kristalhöllinni í Bakú til að æfa lagið Never Forget í síðasta sinn. Dómararennslið fór fram í nótt og stóð til klukkan þrjú að staðartíma.

„Það var ekkert sem fór úrskeiðis eða neitt svoleiðis, allt gekk mjög vel fyrir sig," segir Greta Salóme Stefánsdóttir, Eurovisionfari.

Veðbankar spá hinni sænsku Loreen sigri í kvöld og rússnesku ömmurnar eru samkvæmt þeim líklegastar til að hreppa annað sætið. Þar á eftir koma Serbar í þriðja og Ítalir í því fjórða. Íslenska framlaginu er spáð sautjánda sæti en Greta segist hafa gefið spám lítinn gaum. Hún sé ekki hjátrúarfull en þó fá lukkugripir frá Mosfellsbæ eilítið vægi í kvöld.

„Við fengum tvo litla bangsa frá þeim. Og þeir verða með ykkur í græna herberginu? Já, þeir verða með okkur. En Jónsi, er hann hjátrúarfullur? Nei, það held ég ekki. Hann er reyndar með einhvern hatt með sér, en að öðru leyti þá held ég nú ekki," segir Greta.

Keppnin hefst í kvöld klukkan sjö að íslenskum tíma og er íslenski hópurinn sjöundi á svið.