Skiptar skoðanir um fjármögnun Vaðlaheiðaganga

Skiptar skoðanir eru á meðal stjórnarliða um frumvarp fjármálaráðherra um heimild til að fjármagna Vaðlaheiðargöng. Þingmaður Framsóknar telur að málið nái ekki að fara í gegnum þingið.

Umræður um frumvarpið stóðu fram eftir miðnætti á Alþingi í nótt. Lítið fór fyrir stuðningsmönnum þess og gerðu bæði stjórnarliðar og stjórnarandstæðingar verulegar athugasemdir við málið eins og það kemur fram.

„Það sem var athyglisvert í gær var stjórnarliðar hafa mjög skiptar skoðanir á þessari framkvæmd," segir Vigdís Hauksdóttir, þingmaður Framsóknarflokksins.

Efasemdir um ríkisábyrgðina á framkvæmdinni voru mjög háværar en ríkisábyrgðarsjóður mælir eindregið gegn því að farið verði í hana á þeim grunni sem lagt er upp með.

„Þeir þingmenn sem eru í vinnunni telja að það sé ekki hægt að fara í þetta vegna þess að þetta sé orðið ríkisframkvæmd og þetta er hætt að vera einkaframkvæmd og það er búið að taka þetta verkefni fram yfir í vegaáætlun. Það er bara allt vitlaust út af þessu. Bæði út á landi og hér í Reykjavík," segir Vigdís.

„Þetta er náttúrulega bara alvarlegt mál."

Þegar umræðunni var frestað rétt eftir miðnætti voru sjö enn á mælendaskrá, þar af helmingur stjórnarliðar. Þráðurinn verður líklegast tekinn upp á þinginu að nýju um miðja næstu viku.

„Þetta mál er ekkert að fara í gegnum þingið," segir Vigdís. „Það var lagt til að þetta yrði sett inn í nefnd aftur til að þess að finna út úr þessu, fjárlaganefnd og umhverfis- og samgöngunefnd. Og reyna að fá til sín einhverja ráðgjafa því það gengur ekki að það sé verið að keyra svona mál í gegn án ráðgjafar, það er ekki hægt."