ASÍ undirbýr málaferli gegn ríkinu vegna fjársýsluskatts

Ríkið brýtur gegn jafnræðisreglu með innheimtu fjársýsluskatts frá lífeyrissjóðum segir forseti ASÍ. Hann segir að leysa þurfi vanda vegna lífeyrisskuldbindinga ríkisins eða hækka tekjuskatt um fjögur prósentustig.

Alþýðusamband Íslands (ASÍ) undirbýr nú málaferli á hendur ríkinu vegna fjársýsluskatts sem lagður er á lífeyrissjóði og banka. Með skattlagningunni er lífeyrisþegum í almennum lífeyrissjóðum og lífeyrissjóðum opinberra starfsmanna mismunað, segir Gylfi Arnbjörnsson, forseti ASÍ.

Skattlagningin kemur verr niður á þeim sem eiga réttindi í almennum lífeyrissjóðum en þeim sem greitt hafa í opinbera sjóði sem ríki og sveitarfélög ábyrgjast, sagði Gylfi á fundi um framtíð lífeyrismála á Grand hóteli í gær.

Hann segir almenna lífeyrissjóði verða að skerða greiðslur til sinna lífeyrisþega vegna skattlagningarinnar, en sama eigi ekki við um lífeyrissjóði opinberra starfsmanna. „Þó þeir sjóðir þurfi að greiða skattinn mun ríkið á sama tíma leggja þeim til fjármuni til að sjá til þess að skatturinn hafi ekki áhrif á stöðu sjóðsfélaganna,“ segir Gylfi í samtali við Fréttablaðið.

„Þetta er að mati okkar hjá ASÍ brot á jafnræðisreglu,“ segir Gylfi. Hann segist hafa talið að samkomulag hafi náðst við stjórnvöld um að afturkalla þessa skattlagningu á lífeyrissjóðina. Í ljósi ummæla efnahags- og viðskiptaráðherra og formanns efnahags- og skattanefndar Alþingis á síðustu dögum hafi hann farið að efast um að það gangi eftir.

„Kannski er nauðsynlegt að fá það á hreint að þetta sé brot á jafnræðisreglu og Alþingi geti ekki farið svona fram,“ segir Gylfi.

Þórey S. Þórðardóttir, framkvæmdastjóri Landssamtaka lífeyrissjóða, sagði á fundinum í gær að tekist hafi verið á um það í stjórnum margra lífeyrissjóða hvort skerða þurfi réttindi lífeyrisþega frekar en gert hafi verið.

Gylfi segir það anga af sama vanda, enda mikið ójafnræði milli sjóða í almenna lífeyriskerfinu og sjóða opinberra starfsmanna. Nefnd sem á að endurskoða það fyrirkomulag hefur verið starfandi frá árinu 2009, en mun væntanlega skila sínu verki fljótlega.

„Því miður hallar þarna aftur á mína félagsmenn, lök ávöxtun getur og mun líklega leiða til þess að það þurfi að skerða réttindin vegna þess að við erum ekki að standast þá ávöxtun sem við þurfum til að lofa þessum réttindum. Ríkissjóður mun grípa hitt, og þá þarf að hækka skatta,“ segir Gylfi.

Ófjármögnuð skuld ríkisins við lífeyrissjóði opinberra starfsmanna hefur að sögn Gylfa hækkað um 136 milljarða frá árinu 2007. Hann segir að skuldin hafi hækkað úr ríflega 350 milljörðum í um 500 milljarða króna.

Vegna þessa vantar 28 til 30 milljarða króna á ári frá ríkinu á næstu áratugum inn í sjóðina, þó aðeins sé gert ráð fyrir 10 milljörðum á fjárlögum.

Gylfi segir að þessi halli sé að verða óviðráðanlegur og verði ekki gripið til annarra ráðstafana gæti þurft að hækka tekjuskatt um fjögur prósentustig til að fjármagna greiðslur sjóðanna til sinna félagsmanna.

brjann@frettabladid.is