Síðasta mark Íslandsmótsins 2012 - öll mörkin úr Grindavík í lokaumferðinni

Grindvíkingurinn Hafþór Ægir Vilhjálmsson skoraði 425. og síðasta mark Pepsi-deildarinnar 2012 þegar hann tryggði Grindavík 2-2 jafntefli á móti Fylki með marki í uppbótartíma í lokaumferðinni á laugardaginn.

Hafþór Ægir skoraði markið beint úr aukaspyrnu á sjöundu mínútu í uppbótartíma. Það var ekki tími til að sýna mörkin í uppgjörsþætti Pepsi-markanna á laugardaginn en nú er hægt að sjá mörkin fjögur inn á Vísi eða með því að smella hér fyrir ofan.

Fylkismaðurinn Ingimundur Níels Óskarsson tryggði sér meðal annars bronsskóinn þegar hann skoraði á 70. mínútu í þessum leik og Björgólfur Hideaki Takefusa hélt að hann væri búinn að tryggja Fylki þrjú stig og þar með sjötta sætið þegar hann kom Árbæingum í 2-1 á 82. mínútu.

Hafþór Ægir sá hinsvegar til þess að bæði lið fengu eitt stig og að Fylkismenn enduðu í sjöunda sæti deildarinnar. Hann fagnaði með því að taka nokkrar armbeygjur og Jan Eric Jessen, dómari leiksins, flautaði til leiksloka strax eftir Fylkismenn byrjuðu aftur með boltann.