Tekur 500 klukkustundir að fara yfir málskjölin

Ætla má að það taki verjendur 500 klukkustundir að fara yfir málskjöl í al-Thani málinu gegn fyrrverandi stjórnendum Kaupþings. Þetta sagði Ragnar H. Hall, verjandi eins sakborningsins, við fyrirtöku í morgun. Skjölin eru á 7000 blaðsíðum.

Í málinu eru þeir Hreiðar Már Sigurðsson, fyrrverandi forstjóri Kaupþings, Sigurður Einarsson, fyrrverandi stjórnarformaður, Ólafur Ólafsson einn aðaleigandi bankans, og Magús Guðmundsson, fyrrverandi forstjóri Kaupþings í Lúxemborg sakaðir um markaðsmisnotkun og umboðssvik með því að selja 5% hlut í bankanum í sýndarviðskiptum rétt fyrir hrun bankans.

Við fyrirtökuna í morgun fóru verjendur sakborninganna annars vegar fram á að fá afhentan lista yfir öll símtöl sem voru hleruð við rannsókn málsins og alla tölvupósta sem sérstakur saksóknari lagði hald á. Þeirri kröfu hafnaði sérstakur saksóknari. Þá fóru verjendur fram á lengri frest til þess að skila greinargerðum. Frestur sem þeim hefur verið veittur er til 12. júní en verjendur vilja að hann verði lengdur til 1. október. Segja þeir að vegna þess hve umsvifamikið málið er og skjölin mörg sé ógerningur að skila greinargerðum á svo skömmum tíma.