"Menntaskólakerfið er undirlagt af kannabisneyslu"

Magnús Stefánsson, forvarnarfulltrúi, hefur miklar áhyggjur af aukinni neyslu ungmenna á kannabisefnum. Hann var gestur í útvarpsþættinum Reykjavík síðdegis á Bylgjunni í dag og ræddi við þáttastjórnendur um það mikla framboð fyrir kannabisefnum sem myndast hefur hér á landi.

„Á árunum 2008 til 2010 jókst kannabisframleiðsla hér á landi um 760 prósent," segir Magnús. „Ég held að þessi mikla aukning á framboði tengist peningaleysi fyrst og fremst."

„Ég held að unglingarnir séu farnir að dreifa þessum efnum sjálfir — allt niður í 14 ára gömul börn. Þau vilja ná sér í auka pening og enda síðan með því að fikta við efnin sjálf."

Magnús segir að framboð á fíkniefnum hafi aukist verulega á síðustu árum. Þá telur hann að efnin séu í flestum tilfellum til staðar þegar menntaskólanemar skemmta sér.

„Menntaskólakerfið er undirlagt af kannabisneyslu," segir Magnús.

Hægt er að hlusta á fróðlegt viðtal við Magnús hér fyrir ofan.