Grafið í öskuhaug frá þjóðveldisöld

Íslenskir og kanadískir fornleifafræðingar vinna nú að uppgreftri á Svalbarði við Þistilfjörð. Í sumar stendur til að grafa upp öskuhaug í Hjálmarsvík í Svalbarðstungu, en hann nær að minnsta kosti yfir tímabilið frá þjóðveldisöld og fram á þá fimmtándu.

Unnið hefur verið að rannsókn á byggðarsögu og landnotkun í Svalbarðstungu síðastliðin fjögur sumur. Í ár fékkst þriggja ára styrkur frá kanadíska ríkinu til fornleifarannsókna á svæðinu, en það eru fornleifafræðingar á vegum Fornleifastofnunar Íslands og Laval-háskóla í Quebec sem standa að rannsókninni.

Fundist hafa níu taflmenn úr hvalbeini í öskuhaugnum, teningur, ferhyrnd plata úr hvalbeini sem á hefur verið rituð krossmynd og helmingur hringlaga hvalbeinsplötu með útskornu dýri. „Þótt rannsóknin sé stutt á veg komin er einsýnt að um geysilega merkilegan fund er að ræða, segir í tilkynningu frá Fornleifastofnun Íslands.

Flett hefur verið ofan af tólf fermetra holu og hefur fjöldi dýrabeina komið í ljós. Vonast er til þess að hægt sé að fá upplýsingar um lífsviðurværi íbúa á norðausturhorni landsins á þjóðveldisöld, með tilliti til mataræðis og gripa sem týnst hafa í rusli eða verið fleygt.

- kóp