Villikattaskytta grunuð um ölvun

Lögreglan á Akranesi fékk tilkynningu í síðustu viku um karlmann sem var vopnaður haglabyssu skammt fyrir utan bæinn. Lögreglan fór á vettvang og fann þá mann á ferli sem var sannarlega vopnaður haglabyssu.

Hann útskýrði fyrir lögreglunni að hann hygðist farga villiketti sem gengi nærri lóunni á svæðinu. Lögreglumönnum leist þó ekki betur á manninn en svo að þeir haldlögðu vopnið auk annarrar byssu sem hann reyndist vera með á sér.

Því næst var hann færður á lögreglustöð þar sem blóðsýni voru tekin úr honum þar sem hann var grunaður um að vera ölvaður.