Langur hringur fyrir 20 manns

„Við erum ekki enn komin hringinn, en þess verður ekki langt að bíða úr þessu. Þetta stingur í augað en svona eru þessi blankheit“, segir Þorgrímur Hallgrímsson, rekstrarstjóri hverfastöðvarinnar á Njarðargötu, spurður um óslegnar umferðareyjar við Lönguhlíð. Þar virðist sem grasið sé að hafa betur en grenihríslurnar sem gróðursettar voru til að prýða umhverfið.

Þorgrímur útskýrir að starfsfólk hverfisstöðvarinnar sinni fyrst hreinsunarstörfum á opnum svæðum þar sem fólk kemur gjarnan saman. Verklagið sé jafnframt með þeim hætti að byrjað sé austast á því svæði sem hverfisstöðin sinnir og haldið sé vestur úr. Þorgrímur segir að fyrsti dagur sláttar hjá starfsmönnum á Njarðargötunni hafi verið 29. maí, en svæðið sem stöðin sinnir er allur vesturbærinn og miðbærinn frá Kringlumýrarbraut og vestur á Seltjarnarnes. „Ég er með tuttugu krakka í slætti fyrir allt þetta svæði. En auðvitað myndi ég vilja vera fljótari að þessu eins og fyrir þremur, fjórum árum þegar ég var með um 60 manns í vinnu“, segir Þorgrímur. - shá