Fatasala Rauða krossins fjórfaldaðist frá hruni

Fatasala í verslunum Rauða krossins hefur margfaldast á síðustu árum. Frá hruni hefur salan nær fjórfaldast.

Árið 2005 opnaði Rauði krossinn aðra fataverslun sína á landinu. Það ár seldust föt fyrir um 9 milljónir króna. Síðan þá hefur verslunum fjölgað í fimm og salan hefur margfaldast. Árið 2011 seldust föt fyrir 97,4 milljónir króna.

Komið hefur fram að fataverslun á Íslandi hefur almennt dregist mikið saman frá hruni og ekkert lát er á samdrættinum. Rannsóknarsetur verslunarinnar birti í síðustu viku tölur um að fataverslun hefði dregist saman um 5% í maí miðað við sama tíma í fyrra og 13% í apríl meðan önnur smásala var hægt og bítandi að rétta úr kútnum.

Rauði krossinn hefur ekkert fundið fyrir þessum mótbyr í fatasölu. „Ég sé ekkert sem bendir til þess að vöxturinn muni minnka á næstu árum," segir Örn Ragnarsson, verkefnisstjóri Fatasöfnunar Rauða krossins.

Hann tekur þó fram að um brúttótölur er að ræða, þ.e. ekki er tekið mið af kostnaði við rekstur verslana. Þó um fyrirtaks tekjulind fyrir Rauða krossinn sé að ræða fái hann þennan pening ekki beint í vasann. Verslunum hefur til að mynda fjölgað og með þeim fylgir aukinn kostnaður.