Einar: Erum í þessu til að ná árangri

Einar Þorvarðarson, framkvæmdarstjóri HSÍ, kann ágætlega við riðilinn sem Ísland fékk í undankeppni EM 2014.

Ísland verður í riðli með Slóveníu, Hvíta-Rússlandi og sigurvegara C-riðils forkeppninnar en það kemur í ljós í júní hvaða lið muni bera sigur úr býtum í þeim riðli.

Einar var viðstaddur þegar dregið var í Kaupmannahöfn í dag. „Riðillinn gæti verið verri - það voru til dæmis mjög sterk lið bæði í 4. og 7. riðli," sagði Einar.

„Ég myndi svo tippa á að fjórða liðið í riðlinum verði Rúmenía og því ljóst að riðillinn verður sterkur. En þannig er það alltaf. Síðast þurftum við að spila við Noreg og Austurríki."

Ef Rúmenía verður fjórða liðið í riðlinum þarf Ísland að fara í löng ferðalög í alla útileikina. „Það er auðvitað dýrt en er einfaldlega hluti af þessu. Við erum í þessu til að ná árangri og gerum bara það sem þarf."