Ástþór segir galla á kosningakerfinu

Á morgun verður tilkynnt hverjir hafa skilað inn fullgildu framboði og verða í framboði til embættis forseta Íslands. Ástþór Magnússon, forsetaframbjóðandi, hefur verið andvaka vegna þess að stuðningsmannalistar hans hafa ekki fengið formlega staðfestingu og því er mögulegt að framboð hans verði ekki talið fullgilt.

Ástþór telur ákveðinn galla á kosningakerfinu að hægt sé að falsa undirskriftir á framboðslista forsetaefna með þeim afleiðingum að framboð þeirra teljist ekki gilt. Hann segist hafa lausn við þessu vandamáli til frambúðar.

„Hún er mjög einföld. Það ætti bara að opna öruggt viðmót, eins og netbankaviðmót, fyrir frambjóðendur til að slá inn lista sína um leið og þeir berast. Um leið yrði tékkað hvort kennitölur stemma og sendar tilkynningar í netbanka þeirra sem eru á listanum um að búið sé að skrá þá á slíka lista. Þannig gæti viðkomandi bara ýtt á einn takka og tilkynnt um misferlið ef nafn hans hefði verið falsað."

Rætt var við Ástþór í útvarpsþættinum Reykjavík Síðdegis í dag. Þar viðraði hann áhyggjur af því að fjölmiðlar héldu lýðræðinu í heljargreipum og fjallaði almennt um framboð sitt.