Íslenskir unglingar reykja minnst allra unglinga í Evrópu

Samkvæmt glænýjum niðurstöðum evrópsku vímuefnarannsóknarinnar European School Survey Project on Alcohol and Drugs (ESPAD) sem kynntar voru í Stokkhólmi í dag hefur dregið mikið úr tóbaksreykingum íslenskra unglinga á síðustu sextán árum, ólíkt því sem gerist að meðaltali í Evrópu.

Íslenskir unglingar reykja nú í fyrsta sinn minnst allra unglinga í Evrópu. Þetta kemur fram í tilkynningu frá Þóroddi Bjarnasyni, prófessors í félagsfræði við Háskólann á Akureyri.

Árið 1995 hafði þriðji hver íslenskur unglingur reykt sígarettur síðastliðna 30 daga sem var rétt um meðaltal Evrópu. Sextán árum síðar átti þetta við um tíunda hvern ungling á Íslandi en hlutfallið hafði að meðaltali lítið breyst í Evrópu.

Aðgengi íslenskra unglinga að sígarettum hefur minnkað mikið en viðhorf þeirra til skaðsemi reykinga hafa hins vegar tiltölulega lítið breyst á þessu tímabili. Árangur Íslendinga í tóbaksforvörnum meðal unglinga virðist því einkum mega rekja til minna aðgengis þeirra að sígarettum.

Þess má jafnframt geta að í dag er hinn árlegi dagur Alþjóðaheilbrigðisstofnunarinnar (WHO), Dagur án tóbaks.