Sumargötur vakna úr vetrardvala á morgun

Á morgun vakna sumargötur úr vetrardvala þegar Pósthússtræti í miðborg Reykjavíkur verður lokað fyrir bílaumferð.

Bifreiðarstöður í götunni sunnan Hafnarstrætis verða óheimilar á meðan gatan er göngugata eða frá morgundeginum til þriðja september.

Á vefsíðu Reykjavíkurborgar segir að sumargötur í miðborg Reykjavíkur hafi gefið góða raun.

Borgarbúar hafi almennt verið ánægðir með það fyrirkomulag að breyta vinsælum götum í miðborginni í göngugötur yfir sumartímann. Þær bæti mannlífið í borginni, svifryk minnkar og þær dragi úr mengun frá útblæstri bifreiða.