Fjölmiðlanefnd ætlar ekki að aðhafast vegna kvörtunar

Fjölmiðlanefnd ætlar ekki að aðhafast vegna kvörtunar Þórs Saari, þingmanns Hreyfingarinnar, vegna ákvörðunar Stöðvar 2 um að ræða einungis við tvo frambjóðendur til forsetakosninga af sjö.

Þór vildi meina að Stöð 2 væri brotlegt við 26. grein fjölmiðlalaga en í svari nefndarinnar, sem birtist á vef hennar, segir orðrétt: „Ekki hefur nefndin heldur heimild til að gefa fjölmiðlaveitum fyrirmæli um hvernig umfjöllun þeirra í aðdraganda kosninga skuli háttað. Þann 14. maí 2012 tók nefndin því þá ákvörðun, eftir athugun að eigin frumkvæði á því hvort ástæða væri til almennra aðgerða í aðdraganda kosninga, að slíkt kæmi ekki til álita í ljósi valdheimilda nefndarinnar.“

Ólafur Ragnar Grímsson og Þóra Arnórsdóttir verða tvö ein í kappræðum sem fram fara í Hörpu á sunnudaginn og sýnt verður beint frá á Stöð 2.