Flugdólgi vísað út úr flugvél - endaði í fangaklefa

Flugstjóri flugvélar, sem var á leið til Lundúna frá Keflavíkurflugvelli í vikunni, neitaði að fljúga með erlendan karlmann á fertugsaldri vegna ölvunarástands hans. Honum var vísað út úr flugvélinni og tóku lögreglumenn á móti honum í flugstöðinni. Honum var tilkynnt að hann þyrfti að gera hlé á ferðalagi sínu og gista á flughóteli.

Þegar farið var með manninn þangað harðneitaði hann að gistar og var orðinn hinn argasti í öllu viðmóti, að sögn lögreglu. Hann var því fluttur á lögreglustöðina þar sem hann var látinn sofa úr sér. Þegar hann hafi lagt sig í fjóra klukkutíma vildi hann fá að komast á hótelið og sofa þar áfram. Lögreglumenn samþykktu það og hleyptu honum út úr fangaklefanum.

Þegar verið var að afhenda honum muni sína lét hann skapið hlaupa með sig í gönur og var vísað út af lögreglustöðinni. Frekari fréttir af manninum hefur lögregla ekki, hann hefur eflaust lagt sig og tekið næsta flug heim.